‘रफीक’ देहियां लिक्खी गेह नाटियां, लोक अज्ज भी बजदे चाटियां
-
लायक राम ‘रफीक’ होरां देयां गीतां च बसदी पहाड़े दी रूह
वीरेंद्र शर्मा ‘वीर’/ चंडीगढ़
सांस्कृतिक विकास त्याहसक प्रक्रिया है। साड़े पूर्वजां मतियां चीजां अपणेयां पुरखेयां ते सिखियां कनै बदलोंदे समे सौगी अपणे स्हाबैं तिन्हां च बाद्धा कित्ता। जेहड़ा गैरजरूरी था सैह छडी ता, जिह्यां- जिह्यां समां गांह बधदा जांदा, अहां नौंएं बचार, नौंइयां भावना जोड़दे चली जांदे। इस तरीके नै संस्कृति इक्की ते दूइया पीढिय़ा जो मिलदी।
जेहड़ा सांजो बुजुर्गां ते मिलदा तिसजो असां बरासत बोलदे। एह बरासत कई तरीके यां दी हुंदी। इन्हां तरीके यां च इक्क ऐ सांस्कृतिक बरासत।
कसान परुआरे दे घरें जम्मे लायक
पराणेयां समेयां च दिखणे- सुणने जो मिलदा भई कोई न कोई माहणु अपणे स्हाबैं संस्कार कनै संस्कृतिया खात्तर जिंदगी भर जिया। लायक़ राम रफीक दे नाएं दे जरिए देह्या ई इक उदाहरण सामणे औंदा।
लायक राम ‘रफीक’ दा जन्म सिमला जिले दी ठियोग तसीला दे खगादल क्षेत्र च नंगळ देवी नाएं दिया जगह नळेह्या ग्राएं दे सधारण देह कसान परुआरे दे मुखिया हरिया राम होरां दैं घरैं माता धन्खो देवी दिया कुक्खा ते नागपंचमी आळे ध्याड़ै सन 1941 च होया।
नौमियां च छुट्टी गेई पढ़ाई
लायक राम ‘रफीक’ जो घरे ते त्रै किलोमीटर दूर स्कूले च पढऩा पाया। तीजिया- चौथिया जमाती दे गांह स्कूले दिया पढ़ाइया च मन नी लगदा था, हालांकि लाइब्रेरी च जाई कहाणियां, कवतां, गज़लां दियां नौंइयां- नौंइयां कताबां पढऩे दा सौक लगी गेया।
जिह्यां-तिह्यां नौमियां जमाती तिक्कर पढ़ी सके कनै बादे च स्कूल छड्डी ता। किछ समा लोकगीत गांदे- बजांदे खेत्तरां च कम्म करदे। डंगरां चारदेयां ज्यादा वक्त बीतणा लग्गा। जां दिन- दिन भर ठियोग लाइब्रेरी च पढ़देयां बीतणा लग्गा।
क्योलेयां ने कंधा पर लिखदे थे ‘रफीक’
इत्थु ते ई लायक राम ‘रफीक’ जो अपणी संस्कृति नै डुग्घा प्यार होई गेया। मां बोल्ली कनै रीति-रुआजां, संस्कारां, रहण-सैहण जो डुग्घयाइया च जाई जाणने दी इच्छा जाग्गी। अपणे मने दे भाव उकेरी कवता, गीत लिखणे दी आदत पेई गेई।
कई बरी कागज़ कलम नी होए तां चुल्ही दे बुज्जेयां क्योलेयां लेई घरे दियां कंधां पर बि लिखी सुटणा, ताकि भुल्ली बि जाण तां भी लिखेया सामणे रैह। इस खात्तर गाळीं बि बडिय़ां पौणियां।
आईटीबीपी च भरती होये
बड्डा होणे परंत कोई बिह्यां- इक्कियां बरियां दे हुंग्गे तां लायक राम ‘रफीक’ कमाणे खाणे खात्तर साल 1962 च आईटीबीपी च भरती होईगे, पर मन नी लग्गा। चार-पंज्ज बरियां नौकरी करने परंत नौकरी छड्डी घरे जो आई गे। किछ समा घरैं बताया।
घरे आळेयां फागु दे नेड़ैं कढरव ग्राएं दी गुलाबो देवी नै ब्याह कराई ता। ब्याह होणे परन्त लायक राम जो परुआरे दा ढिढ पाळने ताईं कमाणे दी लोड़ मसूस होई तां फिरी हिमाचल विश्वविद्यालय च सिक्योरिटी गार्ड दी नौकरी करी लेई, पर एह नौकरी बि मती देर नी चल्ली।
अकाशवाणी ते मिल्ली चमक
इस दुरान थोड़ा बौत झुकाव कनै जुड़ाव आकाशवाणी नै बि होई गेया। एत्थु कैजुअल गायक कनै ढोलकी बजाणे आळे कलाकार दी नौकरी करी लेई। इसते जिह्यां- तिह्यां गुज़ारा हुंदा रेह्या।
लायक राम ‘रफीक’ जो लिखणे दा शौक माऊ दे सुरगबास होणे परंत ताहलु लग्गा, जाहलु तिसा दी कमी मसूस हुंदी कनै बेदण लगदी। माऊ दिया यादा पर लिखेया पैहला गाणा ‘सुपणैंदी मिलेली आमेया तू मेरिये, बैगी बुरो लागो तेरो आज’ बड़ा मसहूर होया।
गीत लिक्खे, धुना बणाईयां
तिन्हां दे लिखयो गीत रूहा दे अंदरे तिक्कर उतरी जांदे कनै झंझकोड़दे। लिखणे दा हुनर देह्या भई कलमा ते हल्के-फुलके, गहरे, ठेठ पहाड़ी तौर- तरीकेयां नै लिखियां रचना तरोताजा करी दिंदियां।
लायक राम ‘रफीक’ होरां दियां लिखियां नाटियां मजूदा युवा पीढ़ी जो पहाड़ी बोलिया कनै संस्कृति जो ही तवज्जो नी दिंदी, तिसा जो बि नचाणे दा दम रखदियां।
इक समा था भई रफीक खुद फि़ल्मी संगीत दे दीवाने थे, कनै अपणे लिखेयां गीतां दी धुन बि बणांदे। आकाशवाणी च कम्म करदे दुरान आल्हा दर्जे दे कलाकार हीरा सिंह कंवर होरां नै दोस्ती होई गेई।
स्टूडियो च ढोलक वादक
उस समैं लाइव रिकार्डिंग ही हुंदी थी। इक एलबम त्यार करने ताईं सारे गायक कनै बजंतरी कलाकार महीना- महीना भर रिकॉर्डिंग स्टूडियो च डेरा लाई रैंहदे।
उस समें च बॉलीबुड च हत्थ अजमाई के मुंबई ते मुड़ी के घरैं आए एसडी कश्यप होंरा म्हाचली कलाकारां जो रिकॉर्डिंग दी सुबधा देणे ताईं मंडी दे सकरोहा ग्रांए च ‘साउंड एंड साउंड स्टूडियो’ खोलेया।
यह इकलौता रिकार्डिंग स्टूडियो था, जिथु गाई के कलाकार संतुष्ट हुंदे। साल 1991 दी सुरुआत दी गल्ल ऐ हीरा सिंह कंवर अपणे इक्क गीते दी रिकॉर्डिंग ताईं पूरी कलाकार मंडळी सौग्गी सकरोआ गे। इसा मंडळिया च लायक राम ‘रफीक’ बि बतौर ढोलक मास्टर सामल थे।
‘नीलिमा’ अलबम दी गूंज
गल्लां- गल्लां च एस डी कश्यप होरां रफीक जो बोल्या भई तुहाड़े भाव बड़े गहरे हन्न कनै शैली जड़ां नै जुडिय़ो कनै अनूठी है। तुसां सिर्फ अपणे ताईं मत लिखा। तुहां खुल्ली के होर गायकां ताईं बि लिखा।
इह्यां करी सकरोहा स्टूडियो च ई मसहूर एलबम ‘नीलिमा’ दी रचना होई, जिस दे गाणे ‘नीलिमा नीलिमा’ जिसजो जो शारदा शर्मा होरां गाया।
इसते बाद एसडी कश्यप कनै रफीक होरां दा दोस्तिया दा रिस्ता परूआरे दे रिस्ते च बदलोई गेया। इस दुरान रफीक होरां दुआ ब्याह करी लेया कनै घरैं झगड़े लग्गे होणां तां साल भर सकरोहा इ रेह।
इक्क ते इक्क हिट कैसट
झुमरी, बछोड़ा, प्रेम, भजन बगैरा दी खूब रचना लग्गी होणा। नीलिमा कैसेट दी सफलता परंत रफीक होरां मुड़ी के नी दिक्खेया।
दलवीर धांटा, रामकृष्ण दियां उआजा च ‘सावन याद करता है’, रेणु भारद्वाज, शारदा शर्मा दी उआजां च ‘आन मिलो सजना’ ‘तुम्हारे लिए’ हीरा सिंह कंवर, ‘इशारों इशारों में’-शारदा शर्मा, ‘मेरी बालमा’ श्याम सिंगटा, सीताराम दलबीर धांटा, व नरेंद्र रंजन, ‘बहुत दिन हुए’ परदेसी, ‘वो जब याद आए’, ‘पुकारता चला हूँ मैं’, ‘गोरे रंगो न तु करो गुमान’, ‘जबानी सदा नी रैहणी’ देह्यि इक्क ते इक्क हिट कैसटां कड्डियां।
नाटी किंग दे किंग मेकर
नाटी किंग कुलदीप शर्मा जो तां नाटी किंग बणाणे आळे बि लायक राम ‘रफीक’ ई थे। एलबम- ‘रुला के गया सपना’, ‘मेरी मोनिका’, ‘नशा ही नशा’, ‘मेरी प्रीति जिंटा’, ‘दिल में प्यारी इंदरा’, ‘ओ सोनुए’, ‘हाए मीरा राणिएं’ देहियां हिट कैसटां कड्डियां।
लायक राम ‘रफीक’ होरां दे लिखेयो किछ मसहूर गाणे जो कुलदीप शर्मा नै गाए तिन्हां च किछ हन्न- ‘सुपणे दी मिली आमया तू मेरिए’, ‘ऐय्या ऐय्या ना ना ना ऐ साळिए’, ‘गोरी हम हैं तेरे दीवाने’, ‘रोयो रात दी काटी न्हेरे’, ‘हामों लागा देरे दांदो रा चाओ’, ‘आजा रे आजा रे’, सुन मेरी राम कलिए,‘प्यारी इंदरा जाणा घुमदे जाखु हिल स्टेशना’,‘आंख लांदी काजळो हाए मीरा राणिए’,‘मैया दर पे चलो’।
केईया गायकां गाये गीत
तिन्हां किशन वर्मा, हीरा सिंह कंवर, मोहन सिंह चौहान, सुरेश शर्मा, प्रदीप शर्मा, महेंद्र राठौर, राजेश रंजन, संजीव शर्मा, राजीव शर्मा, राजीव राजा, सुरेंद्र जस्टा, डॉ. महिंद्र राठौर, हरि सिंह वर्मा समेत ठियोग कनै सिमले दे लगभग सारे नौंएं- पराणे गायकां जो पछयाण दित्ती। तिन्हां देयां गीतां जो केंई गायकां आवाज दित्ती।
फिल्मा च फौजी दा रोल
गायकां इन्हा दे लिखेयो ‘फूंकणे दै पौलिये जीउ मेरा औरा टालै रैके रिये मानतौ एहीं आगैये न जाले’ ‘एखळ मुंह छोड़ी गुए बरबाद करियो’,‘डरे रे तुरिए खुश्क दुनिया’, ‘खड़ी कुआळिए’, ‘रोइयों रातड़ी काटे नैरे सघियां’, ‘तेरा मेरा प्यार अडि़ए बचपनो रा’ सेई अणमुक हिट गीत गाए।
मतियां वीडियो एलबमां च कम्म करने सौग्गी रफीक होरां इक्क हिंदी फीचर फिल्म फौजी दा रोल कित्ता। तिन्हां टी सीरीज ताईं बि माता दियां भेंटां लिखियां।
पच्चीस सौ गीत लिक्खे
लायक राम ‘रफीक’ होरां अपणे जींदे जी करीब पच्चीस सौ गाणे, नाटियां, कव्वालियां, भजन लिक्खे। ये सब जबरेयां, जुआन सबनां च हिट होए। तिन्हां जो एक्सपेरिमेंट करना हमेसा पसंद था। संवेदना नै भरेयो ऐसे गीत रचियता थे जेहड़ा महेसा नौई रचना ताईं इक्क छोटे बच्चे साईं उत्सुक रैंहदे।
तिन्हां दा मनणा था भई पारंपरिक गीतां च कोई न कोई त्याहस छिपया हुंदा। लेखक, गीतकार जो हर समै चेतनाबद्ध होई लिखणा चाहिदा। इस करी गीतां दे सार तत्व कनै शिक्षाप्रद होणे पर गीतां दी सार्थक ता लम्मे समे तिक्कर बणियो रेह्यी सक दी। सैह बोलदे थे भई जिन्ना खून पसीना लगदा उतणा इ रंग रचना च औंदा।
गरीबिया च ही लिक्खे गीत
लायक राम ‘रफीक’ होरां दे लिखेयो गीतां नाटियां गाई मते सारे गायक तारेयां साईं चमकी गे, अपर तिन्हां सारी जिंदगी लगभग गरीबिया च ई कटी ती। ल्हात इतणे खरे नी रेह भई कि अपणेयां लिखेयां अणमुक गीतां दी कोई कताब बि छाप्पी सकन। सैह गलांदे थे भई जे कवता, गीत, नाटी, भजन संस्कृति ऐ तां संगीत श्रृंगार।
ठियोग दी साहित्यिक संस्था ‘सर्जक परिवार’ कनै रिस्ते मजबूत रेह। मते सारे अवार्ड मिल्ले। हिम उत्कर्ष संस्था पास्से ते स्टेट लेवल दा हिमाचल श्री अवार्ड कनै नौ दिसंबर 2018 को बंबई दी इक्क संस्था ने तिन्हां जो लाइफ टाइम अचीवमेंट अवार्ड दित्ता, पर सरकारी तौर पर कुछ खास नी होया। आकाशवाणी दे ए ग्रेड गायक कलाकार होणे ते करी इक्क हजार रपेए पेंशन लग्गी सकी।
अस्त होई गेया ‘तारा’
पिछलियां चार बरियां ते लायक राम ‘रफीक’ बमार थे लगी पेओ रैहणा। हाक्खीं बि घट्ट ई दुसदा था, पर हिम्मत नी हारदे थे। पहाड़ी लोक संस्कृति दी महक चार- चफिरदिया फलाणे कनै पहाड़ी गीत- संगीत जो दिशा दसणे आळा ध्रुव तारा दो मुन्नियां सत्या भोक्टा, कृष्णा वर्मा कनै घरेआळिया जो रोंदेयां बिलखदेयां छड्डी 6 सितंबर 2019 ध्याड़े म्हेसा ताईं अस्त होई गेया।
इस विषय ने जुड़ियां होर पोस्टां-
