प्रताप शर्मा : लोकगीतां दा बादशाह, फाकेयां दा गवाह
-
उत्तर क्षेत्र सांस्कृतिक केंद्र पटियाला ने छपवाई थी प्रतापुए देयां गींता दी क्ताब ‘मेरी धरती मेरे गीत’
वीरेंद्र शर्मा वीर/ चंडीगढ़
देसज परंपरा ते निकली के खरियां-खरियां चीजां कालांतर च लोक संस्कृति बणी जांदियां। लोक संस्कृतितां लोकां दे दिल- दमागे कनै रोजमर्रा दी जिंदगी च डुग्घयाइया तिक्कर रची बसियो हुंदी।
लग- लग समे पर लग- लग लाके यां च लाह्दा- लाह्दा माहणुआं अपणे नेड़े- तेड़े ते कुदरता दी देन रुख-बूटे पंछी, खेत्तर नदी- नाळु दी खूबसूरती, परिकथां पर अपणी लोकभाषा/ लोकवाणी च लोक कथां, लोक गीत लिखे गाए कनै इन्हां तरानेयां सौगी- सौगी अमर होईगे।
पहाड़ी सुरां के सरताज, लोकगाथां जो अपणे भोळेपण सहज, सिद्धे सादे अंदाज़ च गाणे / झंझोटी लिखणे कनै गाणे आळी कलम कनै मखमली उआज प्रताप शर्मा उर्फ प्रतापु भी देई खूबियां दे मालक थे।
तिन्न जमाती तिकर ही पढ़ी पाए
म्हाचली संस्कृति दी नुहार प्रताप शर्मा होरां दा जन्म 23 जनवरी 1927 दै ध्याडैं कांगड़ा जिले दे त्याहसक प्रागपुर दे नेडैं नळेटी ग्राएं च मिणहत मजदूरी करी गुजारा करदे इक्क आम परुआरे दे माहणु पंडित झाणुराम कनै काळोदेवी दैं घरैं होया।
प्रागपुर दे वपारी सेठ नुहारू मल्ल होरां शिक्षा धर्मसभा कनै संस्कृत शिक्षा नाएं ते प्राइमरी स्कूल खोलेया था, जिस च चौथी तिक्कर पढाइ हुंदी थी। तिस च दाखला लेया। गरीबी होणे करी तीसरी क्लास जिह्यां-तिह्यां पास कित्ती पर गांह नी पढ़ी सके।
चौदहां सालां दिया उमरा ब्याह
सन 1941 च चौदहां सालां दिया तूहणियां दिया उम्रा च माऊं पियोआं प्रताप शर्मा दा ब्याह करीता। पिता जो गीत- संगीत बड़ा पसंद था, खेतरां च कम्म करदे बेलैं बि किछ न किछ गांदे- गुणगुणांदे इ रैंहदे।
टब्बरे दा टिड्ढ पाळने ताईं मिणहत मजूरी बि करदे, कनै लोक गीत गांदे, कथां कीर्तण बि करदे। पिते सौगी रह्यी प्रतापुए जो बि गाणे दी लत लगी गई। पिता नै बि शौक दिक्खेया तां तौर तरीके सखाए।
गाणे का शौक, रोटिया तांई मंजूरी
इस तरह पिता झाणुराम प्रताप शर्मा दे प्रेरक कनै गुरू दोनों बणे। चार मुन्नु कनै त्रै मुन्नियां, सत्त न्याणे होई गे तां मजदूरी बि कित्ती। कैंह कि तिन्हां समेयां गाणे गाइ के टब्बरे दा पेट तां पलदा नी था, कनै नौकरिया दा जुगाड़ होआ नी था करदा। सन 1961 च पिता सुरग सधारी गे। थोड़ेयां दिना बाद तिन्हां दा बणाया पराणा टप्परू बि ढई गेया। टब्बरे दा टिड्ढ भरने खात्तर किछ समां सब भुल्ली के सिर्फ मजदूरी ही कित्ती।
26 जनवरी 1962 दै ध्याडैं अपणी तुकबंदी दा सहारा लई आजादिया पर लिखेया। गीत अपणै पराणै स्कूलैं प्रागपुर गाया। तिन्हां दे पड़ेसी बड्डे विद्वान पंडित दुर्गादत्त शास्त्री होरां सुणेयां तां बड़े खुस होए।
प्रताप शर्मा दे माड़े ल्हात कुसी ते लुक्केयो तां थे नी। दुर्गादत शास्त्री होरां कनैं पंडित सुशील रत्न होरां लोक संपर्क पभाग कांगड़ा च मास्टर श्याम सुंदर दी लीडरी हेठ संगीत पार्टी च आंशिक नौकरी दुआई ती।
इन्जां बणेंया अमर लोक गीत
मास्टर श्याम सुंदर संगीताचार्य थे । तिन्हां गाणे बणाणे, संगीत दियां बरीकियां दस्सियां। तिन्हां दिना डीपीआरओ प्रोफेसर चंद्रबर्कर थे। जिन्हां प्रतापुए जो बोल्या पई किछ देह्या लिखी कनै धुन्न बणाई के ल्योआ जो कुदरता नै तां जुड़ेया होऐ ई कन्नै कांगड़े दे जीणे दी नुहार पेश करी दैं।
इन्हां दिनां सारा जत्था नुक्कड़ नाटक करी, गीत गाणे सौगी, ताहलकणियां सरकारां दियां नीतियां दा प्रचार प्रसार ग्राएं-ग्राएं जाई करदा था। बस इस प्रेरणा ते जमेया कालजयी लोकगीत गीत–
‘ठंडी ठंडी हवा जे झुलदी
झुलदे चीलां दे डाळु
जीणा कांगड़े दा।
राग-रागणियां दा डुग्घा अध्ययन
गांह चल्ली के एह गाणा लोक गीत बणी हर माहणुए दियी जीभा पर चढी गेया, कनै देस- प्रदेस च देह्या मसहूर होया पई ‘प्रतापु’ न सिर्फ प्रताप चंद शर्मा ‘प्रताप’ बणे, सोगी ही महाचली लोक संस्कृति दी असल नुहार बि बणी गे।
कांगडा, हमीरपुर, ऊना दे हर ग्राएं च प्रचार करने दुरान इन्हां जिलेयां दे हर ग्राएं च गोंदियां राग- रागणियां दा डुग्घा अध्ययन कित्ता, कनै फिरी सुरसती माता दे सीरबादे नै इक्क ते बधी इक्क गाणे लखोंदे गे।
आकाशवाणी शिमला ते प्रसारण
जाहलु चीन नै आक्रमण कित्ता तां प्रताप शर्मा होरां, ‘‘जे तू चल्ला नेफा नौकरी, मेरे गळे दे हारे लैंदा जायां’ लिखेगा कनै चंद्रबर्कर होरां दे आदेश पर जगह- जगह गाया।
एह गाणा बि लोकां दी जुबान पर चढी लोकगीत बणी गेया कनै होर खरा लिखणे दी प्रेरणा मिल्ली। साल 1968 च आकाशवाणी शिमला ते बि तिन्हां देयां गीतां दा प्रसारण शुरू होई गेया।
जालंधर दूरदर्शन ने भी जुड़े
इक तारा (धंतारू) बंझे दी डंडी, पतली तार कनै तुंबा (पक्के या घिया सुकाई ) कनै बकरे दी खल्ल लई अप्पु ई कई बरी बणाया कनै कालजयी गीत, तिन्हां दियां धुना रचियां। साल 1984 ते बाद जालंधर दूरदर्शन नै जुडे कनै इत्थु ते बि किछ प्रोग्राम प्रसारित होए।
सारी उम्र नीं गेई कड़की
एह सब तां ठीक पर दुखे दी गल्ल जिसा दा तिन्हां जो मरदे दम तक एह मलाल रेह्या पई चौबी साल (1962-1986) जिस लोक संपर्क पभाग कनै सरकार दि सियोआ कित्ती, तिनी ताउम्र आंशिक अनुबंध पर ही रक्खेया। कदी पक्का नी कित्ता, न तन्खा दित्ती।
इक्की प्रोग्रामे दे सिर्फ पंज रपेये मिलणा सुरू होए जो अन्त च चार सौ रपेये तक पुज्जे। इतणे कन्नै न अपणे टिढे दी अग्ग बुज्जी न टब्बरे दी।
मत्तेयां गाये प्रतापुए दे गीत
मतेयां लोकां जिन्हां दी जबान गुरू बोली- बोली नी थक दी थी, तिन्हां प्रताप शर्मा होरां दे गीत कनै धुना चोरी- चोरी अपणे नाएं ते कैसटां कड्डी नां कमाया कनै खूब नोट कुट्टे। केई कैसेट कंपनियां कनै कई गायक बि लोक गीत बोली नै इन्हां देयां गीतां चोरी के अपणे नाएं ते रकार्ड करांदे रेह।
म्हाचले ते बाहर मचाई धूम
लोक कल्याण, बागवानी, छुआछूत, जातपात, साक्षरता, मेला, मस्ती, छिंज, अंधविश्वास, देशभगती, भजन आदि विषयां पर लिक्खे अपणे लोक गीत पहाड़ी धुनां च सजाए। साले च दो चार बरी कदी मेलेयां च साद्दा औंदा तां दो पैसे मिली जांदे।
उत्तर क्षेत्र सांस्कृतिक केंद्र पटियाला दे संगीत नाटक पभाग नै साल 1982 च जुड़ी म्हाचल ते बाहर चंडीगढ, दिल्ली, लखनऊ, जम्मू, पाकिस्तान बार्डर कनै होर मतियां जगहां भारत सरकार दे कार्यक्रम कित्ते।
पटियाले ते छपी किताब
प्रताप शर्मा होरां जो कदी पोथु छापणे दी हिम्मत नी होई। भाषा संस्कृति विभाग कनै अकादमी नै कदी अनुदान आधार पर छापी नी। हर बेलैं चौं चफिरदिया उपेक्षा ई होई।
जाहलु कुथी गल्ल नी बणी तां उत्तर क्षेत्र सांस्कृतिक केंद्र पटियाला जो लिखत अर्जी दित्ती कि सारे नी तां किछ गिणुआं- चुणुआं गीत चुणी पोथु छापी दिन्न, ताकि जाणे ते बाद किछ तां याद रह्यी जाए। उत्तर क्षेत्र सांस्कृतिक केंद्र नै ‘मेरी धरती मेरे गीत’ नाएं ते साल 2005 च छैल पोथु छाप्पेया तिस च 112 भजन कन्ने गीत हन्न।
महिन्द्र कपूर भी होये मुरीद
आल्हा दर्जे दे कलाकार प्रताप चंद शर्मा ‘प्रताप’ दे धंतारु ए कनै जीभा पर सरसुती माता दा देह्या सीरबाद था कि अपणे हुनरे दे दम पर हर कार्यक्रम दी महफिल अपणै नाएं करी लैंदे।
इक बरी दी गल्ल ऐ पई हमीर उत्सव च बंबई ते केके, शैलेंद्र सिंह कनै महिंद्र कपूर आयो थे, पर लोकां ज्यादा तरजीह प्रताप शर्मा होरां जो दित्ती। महिन्द्र कपूर होरां बि लोकां दी मंग मनदेयां अपणा गाणा छड्डी प्रताप होरां जो माइक थमाइ के श्रोता बणी कार्यक्रम दा नंद लेया।
दबोइयो रह्यी पेंशनां दी फाइल
लोक संपर्क पभाग नै जद प्रताप शर्मा होरां जो तन्खाह इ नी दित्ती तां पैन्शन बि कुतु लगणी थी। प्रदेश दी लमें समें तिक्कर सिओआ करने आळे जररतमंद साहित्यकारां/ कलाकारां जो लगणे आळी पैंशन दी फाइल बि दबोइयो रह्यी। तिन्हां जो इसा पेंशनां दे भी काबिल नी समझेया गेया। बुढापा पैंशन जरूर लग्गी पर लूण तमाखु चलाणे ताईं सैह बि नकाफी थी।
आखिरी दिनां च जाहलू बमार थे तां भी कुनी संस्था तिन्हां की मदद करने दी पहल नी कित्ती। मरणे ते बाद जरूर सांसद शांता कुमार देयां प्रयासां ने तिन्हां के परुआरे जो इक्क लख रूपए दी मदद करवाई।
गीतां दा बादशाह गरीब मरेया
अपणी मखमली उआजा दे दमे पर लोक संपर्क पभाग दा एह कलाकार घर- घर जाई अपणा लोहा मनुआणे च तां कामयाब जरूर होई गेया अपर अफसोस कि गरीबिया च जम्मी म्हाचली भाषा/ संस्कृति जो रज्जी के अमीर करी जाणे आला गीतकार- कलाकार मरेया गरीबिया च ई।
यह दुई गल्ल है कि प्रताप शर्मा प्रतापुए देयां गींता गाई के ई तरी गे। अज्ज भी प्रतापुए देयां लिखेयां गीतां गाणे आळेयां दी न कोई कमी है, न ही तिन्हां दा जलबा घट होया है। यह जरूर है कि गीतां रचणे वाला अज्ज इथु नी है।
मिल्ले सम्मान, खाणा रेहा खराब
प्रताप शर्मा देयां लिखेयां- गायां गीतां पर समान तां केई मिल्ले पर लोक गीतां दा यह बादशाह गरीबिया च ही इसा दुनिया ते चली गेया। 23 सितंबर 1969 जो लालचंद प्रार्थी होरां प्रमाण पत्र देई करी सन्मानित कित्ता। 27 अक्तूबर 1974 जो हिमाचल साहित्यकार परिषद, 30 अक्तूबर 1981 जो कांगड़ा लोक साहित्य परिषद नै भी सम्मान पत्र देई करी सन्मानित कित्ता। हिमकला संगम बिलासपुर, जिला सांस्कृतिक परिषद बिलासपुर कनै होर मतियां संस्था सन्मानित कित्ता।
राष्ट्रपति ऑफिस ते भी मिल्ला सम्मान
लोक संस्कृतिक नै लोक गीत विधा च योगदान ताईं भारत सरकार ने राष्ट्रीय पुरस्कार नै नबाजेया। हिमाचल कला संस्कृति अकादमी ने संस्कृत साहित्य प्रथम पुरस्कार, उत्तर प्रदेश संस्कृत अकादमी ने महाकवि श्री वाणभट्ट पुरस्कार, अखिल भारतीय राष्ट्रीय एकता सम्मेलन ने 1994 च राष्ट्रीय ए ता पुरस्कार, उत्तर प्रदेश संस्कृत संस्थान ने विशिष्ट विद्वान पुरस्कार कनैं महामहिम राष्ट्रपति संस्थान ने बि सम्मान पत्र दित्ता।
92वें सालें छडेया चोळा
न पभाग अपणा होया, न गुरु मनणे कनै गाणे चोरी के गाई नै बड्डे माहणु बणने आळे चेले। 92वें सालां दिया उमरा च 27 नवंबर 2018 जो प्रताप होरां दा सुरगबास होई गेया।
अद्धी सदी लोकगायकी करी अमर गीत रचणे कनै लोकां जो नचणे जो मजबूर करी देणे आला कलाकार सदा सरकारी उपेक्षा दा शिकार ई रेह्या।
तिन्हां दी लोकगायकी दी बरासत सांभणे दा ज़िम्मा हुण पोत्तु मोहित शर्मा नै चुक्केया है। उम्मीद रखणी चाहिदी कि प्रताप शर्मा दियां लिखियां सारियां रचनां सामणे ओन।
इस विषय ने जूड़ियां होर पोस्टां
