नारायण चंद पराशर : अंग्रेजी दी पढ़ाई, पहाड़ी दी लड़ाई
-
शिक्षा मंत्री कनै सांसद रेह नारायण चंद पराशर ने कित्ता भगवान बुद्ध दी अमरवाणी दा पहाड़ी अनुवाद
वीरेंद्र शर्मा ‘वीर’
पहाड़ी भाषा मतबल पहाड़ी लाकेयां च बोली जाणे आळी भाषा। पहाड़ी तां अरुणाचल, सिक्किम, उत्तराखंड, उत्तरप्रदेश, जम्मू-कश्मीर, म्हाचल प्रदेश समेत मतेयां प्रदेसां च मते रंग समेटी के मतेयां ई रूपां च बोली कनै लिखी जांदी। म्हाचल प्रदेश च बोली जाणे आळी भाषा जो म्हाचली पहाड़ी गलांदे।
म्हाचल प्रदेशे तां बणेया ई म्हाचली पहाड़ी लाकेयां च मिळदी- जुळदी पहाड़ी बोलियां बोल्ले जाणे आळेयां लाकेयां जो मलाई के। जां बोलिए भई म्हाचली भाषा जो संविधान दी अठमीं अनुसूची च सामल करुआणे दी कोसत हुण ई लग्गी होणा।
म्हाचल बणने ते पैहलैं बी पहाड़ी थी, कनै बादे च तिन्न जोद्धेया परमार, प्रार्थी ते पराशर दी तिकड़ी जे पैदा होणे ते बाद बी, पर जो लड़ाई जींदेयां तिन्ना लड़ी, सैह मां बोलिया ताईं कोई होर नी लड़ी सकेया।
पहाड़िया दिया लड़ाईया दे सपाही
जिह्यां पराणेयां समेयां ते लेई करी चंबा, कांगड़ा, मंडी, सिरमौर, शिमला, कुल्लू हर जगह पहाड़ी बोलणे कनै पहाड़ी भाषा च लिखणे-पढ़ने दे सबूत मिलदे। गुलेर दी राणी विक्रम दा भजन होऐ, कांगड़े च जंत्री जां मंडिया टांकरी च पंचाग।
डॉ. परमार होरां जित्थु वर्तमान म्हाचल दी रेखा खिंज्जी, प्रार्थी होरां निजी कनै सरकारी तौर पर महौल त्यार कित्ता, विधानसभा ते प्रस्ताव पारित करुआए तां पराशर होरां म्हाचल सरकार, जनता कनै केंद्र सरकार, हर मोर्चे पर हर बार साह लैणे सौगी जो बी कित्ता पहाडिया ताईं।
म्हाचली पहाड़ी दे संघर्ष ताई माळा सरूप परोयां सारेयां मोतियां च अज्ज गल्ल म्हाचली पहाड़ी भाषा दे देह ई इक मोती, बेहतरीन सांसद म्हाचले दे पूर्व शिक्षा मंत्री प्रो. नारायण चंद पराशर होरां दी।
पिता रेल महकमे च तकनीकी अफसर
नारायण चंद पराशर होरां दे पिता स्व. नंदलाल होरां भारतीय रेल महकमे च बड़े इ गुणी तकनीकी अधिकारी रेह। सारी उमर तिन्हां फरोजपुर कनै कराची ही नौकरी कित्ती। बुजुर्ग गलांदे कि तिन्हां बी सुणेया था कि नंदलाल होरां रेला या पटड़िया दी दूरे ते उआज सुणी के ई रेला मर्ज दस्सी दिंदे थे।
बड्डे ते बड्डा ताळा-चाबी अप्पु ई लोहा कुट्टी-कु्ट्टी के बणाई दिंदे थे। बुजुर्गां दे टैमे ते ई घरैं रेळ-ठेळ ही। पैसा तिक्कर ब्याजे पर दिंदे थे।
तिन्हां दे तिन्न ब्याह होए। पैहला बसारल ते श्रीमती गंगा देवी होरां ने। सैह बिना लुआदी सुरग सधारी गेईं। दुआ ऊना धुसाड़े ते श्रीमती दुर्गा देवी ने, तिन्हां दैं बि लुआद नी होई।
दुर्गा देवी होरा वंश बेल ताईं अपणेयां हत्थां त्रिया ब्याह कोहला (नदौण) दी श्रीमती फूलां देवी नै करुआया।
दो कुडियां बाद होया मुंडु
फूलां देवी दैं दो कुडियां भगवती देवी कनै सुषमा परंत नारायण चंद पराशर होरां दा जन्म 2 जुलाई,1934 दै सुभ ध्याड़ै फिरोजपुर होया। नंद लाल होरां ग्रां कनै डाकघर सेरा, तहसील नदौण, जिला हमीरपुर दे रहणे आळे थे।
नारायण चंद पराशर होरां दे नाएं पिच्छैं बि रोचक कथा ऐ। बुढ़ापे बेलैं जाहलु वंश बेला च बाधा हुंदे मुंडु होया तां साक्षात नारायण दा प्रसाद समझी नारायण चंद नां रक्खेया।
नारायणं चंद हाल्ली छोटिया उमरा दे थे कि पिता कराची ते रटैर होई के आई गे। कनै मुनु इत्थु नदौण पढ़ना पाई ता।
तळाए च लुकाया खजाना
सब किछ खरा था चल्लेया। नंद लाल होरां सेरैं आई के बी धुआरे पर पैसे देणा शुरू करी ते। तिन्हां समेया च नदौणे दै गरीब राजैं अंग्रेजी हकूमता द कर्ज चुकाणे ताईं रियासता दे सारे अमीर लोकां दैं घरैं छाप्पे पाणा सुरु करी ते।
उड़दी-उड़दी एह खबर नंद लाल होरां कैं बी पुजदेयां टैम नी लग्गा। नंद लाल होरां घरेआळिया नै सलाह-सूत्र कित्ता जे गैहणा-गठडू घरैं रेह्या तां राजैं लुट्टी लीणा।
इसा मुसीबता ते बचणे ताईं सोने-चांदिया दे सारे गैहणे कनै मलकां दे रपैये, घरां दैं सामणै जित्थु अज्ज सेरे दा सरकारी स्कूल ऐ, तित्थु तिन्हां दिनां खरा बड्डा तळा हुंदा हा, न्हेरे देह्यिया गठडु बणाई तिस च दबणे दा फैसला करी लेया। इक्क दिन्न न्हेरैं जाई, सब किछ नसाण लाई के दबी ता।
चोरी होया धन, लग्गा बड्डा झटका
अपर दिन्न माड़े औणा लगी पौन तां सब किछ उलट इ हुंदा। कुसकी परुआरे च हुंदी सारी गल्लां सुणी थियां लेइयां। पीछा कित्ता कनै मौका दिक्खी तळाए ते सब कड्डी के चोरी लीता।
तांह घरैं राजे देयां सपाइयां जो किछ नी मिल्ला कनै तलासी लेई बिना ई बापस हट्टी गे। रौला थमणा लग्गा तां परुआरे सोच्या हुण लेई औंदे तळाए च ते सब कड्ही। पर एह क्या?
धने पर कोह्की पैहलैं इ हत्थ साफ करी के तुरदा बणेया। दुर्गा देवी जो इह गल्ला दा बड्डा झटका लग्गा, गमें ते नी उभरी सकी, कनै सुरग सधारी गई।
लोकां जो जेहड़ा कर्ज दिंदे थे, तिसदा मुंह-जुबानी सहाब- कताब बि दुर्गा देवी कैं इ था। मौका दिक्खी के लोकां दुर्गा दी मौत दा फायदा चक्केया। कर्ज बंडणे आळा परुआर कर्जे च डुबी गेया।
मीट कदी नी खाणे दी कसम
नारायण चंद पराशर दे पिता नंद लाल होरां पक्के मांसाहारी थे, अप्पु शिकार करी के ल्योंदे, अप्पु ई जानवर बड्ढी सुटणा, कनै मीट बणाई खाणा। इक्की बरिया दी गल्ल ऐ नारायण चंद होरां इक्क छेल्लू पाळेया। स्कूले ते आई तिसनै इ खेलणा, कनै सैह अप्पु कनै सुआणा।
छेल्लु बि बड़ा छैळ खेलदा था। इक्क बरी पिता जो मीट खाणे दी तलब लग्गी तां तूहणा देह्या छेल्लू बड्ढी ता। स्कूले ते आई के नरायण चंदैं तोप्या तां छेल्लु नी मिल्ला। पता लग्गा तां पिता नै गल्ल-बात करना छडी ती कनै कसम खाह्दी कि जींदेयां जी कदी जीव हत्या नी करगा, न मीट ई कदी खांगा।
देश होया आजाद, घरें गरीबिया दी गुलामी
इसा घटना दा असर जन्मभर रेह्या, कनै ऐह ई घटना नारायण चंद पराशर होरां जो महात्मा बुद्ध कनै बुद्ध धर्म पास्से जो खिंज्जी के लई जाणे कनै बुद्ध धर्म दा अनुयायी बणने आळी घटना बणी।
नंद लाल होरां सेरैं ई सरां बणाइयो थी सैह बि ढई गई। देस तां आजाद होया पर पराशर दे पिता गरीबिया दे गुलाम होई गे। कनै दुखां दे मारे सैह बि गुजरी गे।
माता फूलां देवी जो टब्बर पाळना औखा होई गेया। किछ मदद ग्राएं देयां लोकां कित्ती, किछ रिस्तेदारां, पर गुजारा हुंदा नी दुस्सेया।
आईएएस दा टैस्ट पास, इंटरव्यू च फेल
नारायण चंद पंजाब दे होशियारपुर चली गे कुसी कैं नौकरी कित्ती। तिन्हां लाला होरां ई पराशर दी पढ़ने ताईं मदद कित्ती। 1955 च बीए और 1957 च अंग्रेजी च एमए कित्ती। फिरी होशियारपुर दे टांडा उड़मुड़ डीएवी स्कूले च पढ़ाणा लगी पे।
आईएएस दा टैस्ट पास कित्ता। इंटरव्यू च 150 च पंज नंबर ही मिल्ले तां वरोध कित्ता, खबर ताहळके मुख्यमंत्री पंजाब प्रताप सिंह कैरों होरां तिक्कर पुज्जी।
पढ़ाना लग्गे तां ग्राएं च खोलेया स्कूल
नारायण चंद पराशर डीएवी उड़मुड़ पढांदेयां जनसंघ दे डॉ. बलराज मधोक होरां दे संपर्क च आए। टांडा किछ टैम पढ़ाई के दिल्ली यूनिवर्सिटी पढ़ाना लगी पे। जाहलु दिल्ली यूनिवर्सिटी च प्रोफेसर थे तां सबते पैहलें अपणै ग्राएं सेरैं स्कूल खोलेया कनै सुरुआती दौर च अपणिया जेबा ते पैसे भरे।
पिता नंद लाल होरां छोटिया उमरा च ही इन्हां दा रिस्ता हे करी गेयो थे। रोशनी देवी होरां कन्नै ब्याह बि होया पर ज्यादा निभि नी सकी। पैहले ब्याहे ते इक्की मुन्नी ऐ। दुआ ब्याहे ते दो मुन्नु, इक्क मुन्नी।
संसद च पहाड़ी दा मुद्दा चुक्केया
नारायण चंद पराशर म्हेसा इ कोई बि कम सुरू करने ते पैंहलैं बोलदे थे पई- ‘अहां कुळजां जो मत्था टेकी इंकलाब जगाणा।’ कांग्रेस पार्टी नै जुड़े। दिल्ली तां लगी पे रैहणा पर पहाड़ कनै पहाड़ी भाषा कन्नै पैहला प्यार बणेया रेह्या।
दिसंबर 1970 तकीपुर, कांगड़ा विशाल जनसभा कित्ती, बीह हजार लोक कठरोए पहाड़ी दे समर्थन ताईं। नगरोटे दे विधायक हरदयाल होरां कनै परिवहन मंत्री हरिराम होरां प्रस्ताव दा समर्थन कित्ता। सब भाषण पहाड़ी भाषा च होए। कनै इकमत्त पहाड़ी जो संविधान दी अठमीं अनुसूचि च पुआणे ताईं घोषणा कित्ती।
म्हाचल सरकार पासे ते पहाड़ी भाषा दे वकास ताई अकादमी बणाणे दा सुआगत बी कित्ता। संसद च महाचली पहाड़ी दा मुद्दा जोरां-शोरां नै चुक्केया।
हिमधारा कनै युग दिशा दी शुरुआत
नारायण चंद पराशर होरां दे मतियां पत्र-पत्रिकां च लेख-कविता बगैरा छपे। कवियां लई ‘काव्य धारा’ संपादित दे चार अंक निकलवाए। पत्रिका ‘हिम धारा’ कनै ‘युग दिशा’ दी शुरुआत कित्ती।
हिमधारा च तां स्वतंत्रता सेनानी विशेषांक बी कड्डेया। संसार चंद प्रभाकर होरां जो प्रेरित करी पहाड़ी भाषा च धम्मपद लखुआया। मतेया लखारियां जो मंच दित्ता। हिम भारती चलाई, सरकारी पत्रिका गिरिराज च पहाड़ी लेखकां ताईं चार पेज सुरक्षित करुआए।
छोटा उपन्यास ‘ग्राईं कनै तिसरा ग्रां’ लिखेया। मित्रां च हरिचंद हैडमास्टर, नदौणे ते लाला बोध राज जैन, ग्राएं ते हरिचंद पराशर होरां, बलासपुरे ते क्लास फैलो धर्मपाल कौंडल कदी इक्की-दुए जो नी भुल्ले।
‘धम्मपद’ दा पालि कनै पहाड़ी अनुवाद
चौदह साल तपस्या करी भगुआन बुद्ध दी अमर वाणी ‘धम्मपद’ दा पालि कनै पहाड़ी अनुवाद कित्ता। धम्पद दा तां जपान सौगी, अमरीका, एशिया, यूरोप दे मतेयां देशां च लक्खां करोंडां लोक प्यागा संझा जाप करद, मुख जवानी पाठ करदे। ‘डिपार्टमेंट ऑफ बुद्धिस्ट स्टडीज’ ते दिल्ली दे पूर्व मुख्यमंत्री डॉ. साहिब सिंह वर्मा सौग्गी पीएचडी बी करी लइयो थी।
इक्क बरी जपान गेयो थे, तां टोक्यो दे नेडैं शिंजा इवाया महात्मा बुद्ध वाणी पर इन्हां दे कम्म कन्ने ज्ञान ते प्रभावित होई अणमुक पैसा जबरदस्ती दान कित्ता, पर नरायण चंद पराशर ओथी कुसी स्कूले च दान करी ता।
इसा घटना ते बाद जापान च पराशर होरां दी इज्जत होर बि बधी गई, जो अज्ज तक बरकरार ऐ। ओथु बुद्ध वाणी जो तां बड़ी इज्जत देई के पढ़ाया जांदा।
लखारियां ताईं बणाए केई मंच
नरायण चंद पराशर चाहैं शिक्षा मंत्री रेह या सांसद। जीह तिक्कर रेह, पहाड़ी भाषा दी बड़ी सिओआ कित्ती। नौंए-नौंए लखारियां ताईं मंच तैयार करी हर विधा च लिखणे जो कित्ता।
21 फरवरी 2001 जो बिरला मंदिर मत्था टेकणे ते बाद इक्कदम हर्टअटैक औणे करी 66 सालां दिया उमरा च मता किछ अधूरे कम्म छड्डी के सुरंग सधारी गे।
कुथु ते कुथी तिकर सफर
1971-1977 कनै 1980 ते सांसद।
1977-1980 विधायक।
1979-1980 मेम्बर लोक लेखा समिति कन्ने हिमाचल प्रदेश विधानसभा दे अध्यक्ष।
कांग्रेस पार्टी दे हिमाचल प्रदेश दे अध्यक्।
बैस्ट राइटर दा इनाम
इक बरी राज्य स्तरीय प्रतियोगिता होई ता नरायण चंद पराशर होरां डॉ. यशवंत सिंह परमार होरां पर निबंध लिखेया कनै बैस्ट राइटर दा इनाम जित्तेया। नरायण चंद पराशर पालि, संस्कृत हिंदी, म्हाचली, पंजाबी, ऊड़दू, तमिल-तेलगु, बंगाली, तिब्बती, जापानी, चीनी, कनै जर्मन दे जानकार थे।
हमीरपुर कॉलेज दा नां नेताजी सुभाष चंद्र बोस कॉल्ज करुआया। बंगाणा व नदौण कॉलेज खुलाया। एनआईटी हमीरपुर ल्योणे च योगदान, रिवाल्सर पद्म संभव कॉलेज खोलेया कन्ने राज्यस्तरीय हमीर उत्सव दी शुरुआत कित्ती।
नरसिम्हा राव होए प्रभावित
पूर्व प्रधानमंत्री स्व. पीवी नरसिम्हा राव नरायण चंद पराशर होरां दे ज्ञान, सेवा ताईं समर्पित भाव, कनै तर्क-शक्ति ते मते प्रभावित थे।पराशर होरां पहाड़ी गांधी बाबा कांसी राम दे योगदान जो मता याद कित्ता, तिन्हां पर अक्टूबर 1983 जो ज्वालामुखी च इंदिरा गांधी दे हत्थां डाक टिकट जारी करुआया।
सैह नेता जी सुभाष चंद्र बोस ते मता प्रभावित थे। इस करी तिंहां नेता जी सुभाष रिवोल्यूशनरी सोशलिस्ट फोरम (दिल्ली) बणाया।
केई सांस्था दे पदाधिकारी रेह
नरायण चंद पराशर श्री सिद्धार्थ संगम, अखिल भारतीय पर्वत लोक कल्याण सभा नई दिल्ली दे अध्यक्ष, हिमाचली पहाड़ी साहित्य सभा नई दिल्ली, भारतीय भाषा संगम नई दिल्ली, पहाड़ी गांधी बाबा कांसी राम शताब्दी समारोह समिति दे अध्यक्ष, हिमाचल कला संस्कृति एवं भाषाअकादमी कन्ने भारतीय राष्ट्रीय शिक्षक संघ दे उपाध्यक्ष , राष्ट्रीय बोधि संगम दे महामंत्री कन्ने महाबोधि सभा कलकत्ता दे आजीवन सदस्य रेह।
नरायण चंद पराशर सयुंक्त राष्ट्र संघ भारतीय राष्ट्रीय प्रतिनिधिमंडल, यूनेस्को ताईं भारतीय राष्ट्रीय आयोग, राष्ट्रीय शिक्षक आयोग भारत सरकार, कार्यकारी परिषद (हिमाचल विश्वविद्यालय), लुंबिनी विकास भारतीय राष्ट्रीय समिति कन्ने संसदीय कांग्रेस दल कार्यकारिणी दे सदस्य रेह।
इस सब्जेक्टे ने जूड़ियां होर पोस्टां-
