हृदयराम पांथ: अजादिया दी अलख जगाई, जेला च कलम चलाई
वीरेंद्र शर्मा वीर/ चंडीगढ़
देह -देह म्हाचली माहणु होए जिन्हां दा ना सदियां तिक्कर सुनहरी अक्खरां साह्यीं चमकदा रैहणा। इन्हां ही विभूतियां साह्यीं इक्क आदर्शवादी माहणु होए जिन्हां देसे दिया आजादिया खातर प्रजामंडल संघर्ष च हेस्सा लेया, बेडिय़ां च नतड़ोई जेल कट्टी कनै कताबां भी लिखियां, अपर जींदे इसा चीजा दा फैदा नी चुक्केया, न कुथी जिक्र कित्ता।
हुण तिन्हां दे जाणे परंत तिन्हां दे जीवन ने जुड़े किछ प्रेरणादायी किस्सेयां दा जिक्र कित्ता बेहद जाणा जरूरी लग्गा करदा। एह ना होर कोई नी, जिला सिरमौर दे दूरदराज लाके दे नवासी हृदयराम पांथ।
आम घरे च जम्मे पांथ
हृदयराम पांथ होरां दा जन्म 11 जनवरी 1927 दे सुभ ध्याड़ैं बड़े सधारण देह कसान परुआरे ते सबंधित कनै आदर्शवादी माहणु, उस समे दे मसहूर नाड़ी वैद पंडित रामभज शर्मा होरां दैं घरैं होया।
रामभज होरां बड़े धार्मिक बचारां दे मालक कनै समाजसेवी थे। कुसी जो दुखी नी दिक्खी सकदे थे। दुखियारे दी अपणे बिथे ते बि गांह बधी के मदद करदे थे। एह ई आदर्श कनै संस्कार हृदयराम होरां पर बि पे।
राजेयां दा राज कनै अंग्रेजी हकूमत बेरहमियां नै पेस औंदी थी। उप्परे ते कमाइया दे साधन नी। इक्क तां गरीबिया दा सप्प मुसीबत बणी सबना दैं गळै पेया था, दुआ जिला सिरमौरे च उस बेला गिणुआं चिणुआं ई स्कूल हुंदे थे। इस करी ज्यादातर न्याणे जां तां प्राइवेट पढ़दे जां फिरी अनपढ़ रही जांदे।
सिमले दे जलसे दा असर
नौहराधार दे नवासी गुणी सज्जण विपतानंद शास्त्री सौग्गी धर्मचारा पेई गेया था। विपतानंद होरां दैं गलाएं प्राइवेट ई पढ़ाई कित्ती कनै पेपर भरी ते। सन 1946 दी गल्ल है, हृदयराम पांथ शिमलैं पेपर देणा गे।
पेपर देया ई थे करदे कि सुतंतरता आंदोलन ताई सिमलैं बड्डा जलसा था होआ करदा, जिस महात्मा गांधी, जवाहरलाल नेहरू, कैप्टन शाह नवाज़, अरुणा आसफ़ अली सरीखे राष्ट्रीय स्तर दे नेतेआं दे ओजस्वी विचारां सुणी के बड़े प्रभावत होए। फिरी क्या था। पढ़ाई- लखाई सब छड्डी के सुतंतरता आंदोलन च कुद्दी गे।
जेला च आया लिखणे दा हुनर
हृदयराम पांथ सिरमौर वापस आई के सिरमौर प्रजामंडल दा हेस्सा बणी विद्रोह करी ता कनै तौळे ई अंग्रेजी हकूमता दियां आखीं च कंड्डा बणी रडक़णा लगी पे। राजैं बि मते झूठे इल्जाम सिरैं मढ़ी गिरफ्तार करी लेया।
करीब साड्डे पंज महीने बेडिय़ां च जकड़ोई नाहण जेला च कट्टे। माऊ पिओआं दे दित्तेयो संस्कार ई थे जिन्हां दी बदौलत जेला च रैंहणे कनै बेडिय़ां च नतड़ोणे दे बाबजूद भी कदी हिम्मत नी हारे, बल्कि इक्की पास्सैं सिरे दे धार्मिक प्रवृति दे मालक बणी सहनशील हुंदे गे।
दुए पास्सैं सिधांतवादी, कठोर साधक, कड़े फैसले लैणे आळे मनीषी, कवि, साहित्यकार दे रूप च भी अपणी इक्क छबि बणांदे गे।
कुली बणी कित्ता कम्म
हृदयराम पांथ होरां जेला च रैंहदे बेलै कैदियां सौगी सुतंतरता आंदोलन ताईं गीत गाणे सौग्गी- सौग्गी लिखणे दी आदत बणी गई। जेल कट्टी घरैं पुज्जे तां अपणा कनै परुआरे दा पेट पाळने दी चिंता सताणा लग्गी। तां चुप्प करीते घरे ते निकळी गे। कुली बणी बसां पर समान लदणे दा कम्म करना मंजूर करी लेया पर असूलां नै समझौता नी कित्ता।
तिन्हां दिनां दी गल्ल है कि नाहण चौके पर इक्क सज्जण मिल्ले। हाल- चाल पुच्छेया, बेरोजगार होणे दी जानकारी मिलणे पर तिन्हां हृदय राम जो बोल्या भई मेरे बाह्ल इक्क नौकरी है सोलण चपरासी दी। तू कल मेरे नै मिल फिरी दसदा। अपर प्रार्थना पत्र जरूर लिखी ल्योयां।
नौकरी दा सुपणा झूठा
हृदयराम पांथ जो राती एह सोच्ची निंदर नी पई भई हुण नौकरी लगी जाणी कनै तां माड़े दिन गे समझा। दुऐं दिन जाहलु सैह सज्जण मिल्ले तां पैहलैं दो हत्थ जोड़ी माफी मंगी कनै नौकरी देणे दी गल्ला ते एह बोल्ली इन्कार करीता भई मैं असमर्थ होई गेया।
मेरे सामणे दो सुआल खड़ोई गे। पैहला यह कि चपड़ासी दा कम्म कोई बड्डा कम्म नी ऐ। दुआ यह कि भई इक्क सुतंतरता सनानिए जो चपड़ासी दी नौकरी देई कोई उपकार थोड़ी करा करदा।
डंगरे पाळी कित्ता गुजारा
इसते हृदयराम पांथ नरास होई गए पर स्वाभिमान नी छड्डेखा। घरेआळिया दा बि पूरा साथ मिल्ला। किछ बरियां करसानी कित्ती। भेड्डां-बकरियां, गाईं पाळी बि गुजारा कित्ता।
इक्की दिने दी गल्ल ऐ कि आयुर्वेदाचार्य वैद भीमदत्त होरां मिल्ले। हाल- चाल पुछणे परंत तिन्हां सुझा दित्ता कि भई तू तां थोड़ी बौत बदंगी भी जाणदा तां कैंह नी ट्रेनिंग करी लैंदा।
ट्रेनिगा दा खर्च बजीफे नैं निकळी जाणा कनै नौकरी भी मिली जाणी। खुद्दारी इतणी भई ट्रेनिंग दी हाम्मी तां भरी ती पर बजीफा लैणे ते साफ मना करी ता।
ट्रेनिंग करे बणे फार्मासिस्ट
साल 1958-60 च ट्रेनिंग करने परंत हृदयराम पांथ जिला चंबा च बाथरी बतौर फार्मासिस्ट 75 रपये महीना नौकरी लगी गेई। इन्हां दा लेखन कार्य भी कन्नै कन्नै चलदा रेह्या। किछ सालां बाद बदली सिरमौर होई गई कनै नौकरी दुरान उपराळा, मेथली, कोलगा, मवाई, पराड़ा, बोगधार जन सिओआ कित्ती।
पट्टू कनै लोइए बुणने दा हुनर
जदूं पराड़ा नौकरी करदे थे तां इन्हां कुआटरे दे बक्खैं भेड- बकरियां पाळी लइयां। दिनै नौकरी करनी कनै संझा- प्यागा तिन्हां दी सिओआ। तकळी लई उन्न कतणे कनै पैहनणे जो पट्टू, लोइए बणाणे दा कम्म करदे। नौकरिया दुरान सैंकड़ेयां दैं स्हाबैं पट्टू कनै लोइए बणाए।
नौकरिया ते दित्ता त्यागपत्र
हृदयराम पांथ दा मनणा था भई देश गुलाम था ता अंग्रेजां दे कनै राजे दे बंदी रेह कनै नौकरिया च अफसरां दे बौधिक बंदी बणी के। जवानी अंग्रेजां दे खलाफ संघर्ष च खत्म करीती कनै बची-खुची उम्र जिम्मेदारी नभांदेयां कनै नौकरियां च। जेहड़ी बची तिसा च सिर्फ यादां कनै कुढऩ इ ऐ।
हृदयराम पांथ दा बड्डेयां नेतेयां ने रेहा संपर्क बड़े सम्हळी के गैं पुटदे थे फीह् बि अफसरां दे गलत बबहार दिक्खी बि सच्चाइया परती चुप्प रैहणे जो मजबूर होणा पौंदा। दुखी होई रटैर होणे दे समे ते किछ पैहलैं ई साल1987 च त्यागपत्र देई ता।
नेतेयां दे संपर्क च रेह
नौकरी करदे बेलैं वि बड्डे बड्डे नेतेयां दे संपर्क च रेह। चिठी- पत्री बि लिखदे रेह कनै औंदियां बि रहियां। फाइला च पंडत जवाहरलाल नेहरू, इंदिरा गांधी, मोरारजी देसाई, चौधरी चरण सिंह, अटल बिहारी वाजपेयी, हेमवती नन्दनृ बहुगुणा, चौधरी चरण सिंह, जगजीवन राम, चंद्र शेखर, शांता कुमार, वीरभद्र सिंह, संत विनोबा भावे देयां हत्थां लिखियां चिठियां सम्हाळी के रक्खियां।
खीरा तिक चलदी रेहई कलम
जेला च सजा कटणे दुरान कनै बादे च भजन, कवता, लेख, नाटक, निबंध, संस्मरण, कहाणी बगैरा मतियां विधां च लिखणा शुरू कित्ता। तिन्हां दी कलम अंत समय तक चल रेह्यी।
साधु आश्रम होसियारपुर ते पैहली कताब सन 1985 च ‘भजन माला’ दे नाएं छपी कनै मसहूर होई। दूई ‘मानव धर्म’, त्री ‘गरीबी रेखा’, चौथी ‘हरिजन बंधुओं से’, पंजमी ‘मेरी जेल यात्रा’, छेमी ‘आत्म- बोधार्थ’, सतमी ‘हिमाचल के निर्माता कौन’ प्रकाशित होईयां।
इसते लाबा फीस (कहाणी), मां की वीर संतान, दु:खी मनुष्य और भगवान (नाटक त्रय) वास्तविक सुख समृद्धि का सार, श्री लंकेश रावण का आदर्शमय जीवन चरित, भ्रष्टाचार कै से बगैरा पाण्डुलिपियां कनै होर मते विषयां पर पंजाह होर आलेख पांथ होरां दे संग्रह च अप्रकाशित विद्यमान हन्न।
कहाणी ‘फीस’ दीहोई बड़ी चर्चा
इन्हां दी लिखियो क हाणी ‘फीस’ इतणी बधिया है कि पैहले मुख्यमंत्री डॉ. वाई एस परमार होरां बोल्या था कि जे कुथी ऐ कहाणी जवाहरलाल नेहरू होरां लिखियो हुंदी तां सारे संसार च हत्थों- हत्थ मसहूर होई के बिकी जाणी थी।
तिन्हां ऐह बि गलाया था कि भई हिन्दिया दी बजाए पहाड़ी भासा च अनुवाद करी देण। इस पर तिन्हां गलाया भई कुण देह्यी- सब भासा तां अपणियां हन्न ।
सरकारा ते नीं लेया कोई फायदा
हृदयराम पांथ होरां सुतंतरता सनानिया आळी म्हाचल सरकार ते पैसण लैंदे रेह पर न कदी होर कोई फाइदा नी लेया, न केंद्र सरकारा दी पैंसण।
न ई बच्चेयां दी पढ़ाई या नौकरी ताईं सुतंतरता सनानी दा कार्ड लाया। जो सादा परहाबा जेला च था, सैह ई अंत तक रक्खेया। सैह बोलदे थे भई मैं इक्क मुसाफिर इआं। जींदे जी जितणी की जन सिओआ होई सकगी करनी ऐ।
अध्यात्म नै होया गहरा जुड़ाव
हर बेला अप्पु जो इक्क मुसाफिर समझदे इस करी साहित्यिक नां बि ‘पांथ’ चुणेया। नौकरी करदेयां ई अन्तरमुखी होई गेयो थे। सांसारिक गतिविधियां ते दूर अध्यात्म नै जुड़ाव करी लेया था।
धार्मिक ग्रंथ गीता, वेद, उपनिषद्, पुराण, रामायण, महाभारत, श्रीमद्भगवद्गीता, श्रीराम चरित मानस, मनुसमृति, योग वासिष्ठ, भृगु संहिता, श्री गुरु ग्रंथ साहिब जी,गुरुमत सिद्धांत, अध्यात्म रामायण, षड् दर्शन, आयुर्वेद ज्ञान परक कनै होर मतियां कताबां लाइब्रेरिया च सजियां।
उच्च कोटि दे थे विद्वान
हृदयराम पांथ होरां अध्यातम नै इतणे जुड़ी गेयो थे भई कई भविख च होणे आळियां गल्लां दा अहसास तिन्हां जो पैहलैं इ होई जांदा था। अपणे स्थूल शरीर जो छडणे तक दे समे दा पता था।
हृदयराम पांथ होरां नश्वर सरीर त्यागणे ते पूरे बहतर दिन पैहलैं अन्न छडी ता। फिरी फल उसते बाद सिर्फ दुध कनै पाणी कनै अंत दे पंद्रह दिन सिर्फ पाणी दा सेवन कित्ता। उच्च कोटि दे विद्वान, सुतंतरता सनानी हृदय राम पांथ होरां 1 मई 2013 जो अपणे सब फर्ज नभाई एह नश्वर संसार छड्डी चिर यात्रा पर चली गे।
इस स्ब्जेक्ट ने जूड़ियां दूईयां पोस्टां-
